Montse Pena Presas
Montse Pena Presas é profesora de Didáctica da Lingua e da Literatura na Universidade de Santiago de Compostela. Licenciada en Filoloxía Galega e Máster en Edición, doutorouse en Filoloxía pola USC coa tese “Feminismo, xénero e coeducación na literatura infantil e xuvenil: historia crítica e aplicación didáctica”, que dirixiron os profesores Dolores Vilavedra e Bieito Silva. A súa investigación está centrada na literatura infantil e xuvenil contemporánea, cun foco específico na literatura galega, na educación literaria e nos estudos de xénero. Así, ten publicadas dúas monografías sobre esta cuestión: a biografía de María Victoria Moreno, A voz insurrecta (2018, Galaxia) e a obra Feminismos e literatura infantil e xuvenil en Galicia (2018, Laiovento). Ademais de dous volumes divulgativos sobre Roberto Vidal Bolaño e Xela Arias, acaba de editar dúas obras colectivas arredor da figura de Luísa Villalta: Escribir para quen. Relecturas posíbeis de Luísa Villalta (2024, USC), xunto coa profesora María Xesús Nogueira, e Un ruído provocado(r). Voces arredor de Luísa Villalta (2024, Laiovento), en colaboración con Mercedes Queixas. Ademais de numerosos artigos en revistas de investigación, foi crítica literaria en medios como Faro de Vigo, Sermos Galiza, Grial ou a Radio Galega.
Tal multitude que fomos: un achegamento á polifacecia creativa de Luísa Villalta
Villalta foi unha creadora polifacética: dende a música como pano de fondo, como intérprete de violino, cultivou todos os xéneros literarios á vez que reflexionou sobre eles. A pesar de que a autora pasou á historia da literatura fundamentalmente como poeta, cómpre (re)descubrir tamén a súa actividade como dramaturga e narradora. Comprometida coas causas do seu tempo (o non á guerra, a defensa do pobo Palestino e o Nunca Máis, entre outras), a súa actividade como columnista no xornal A Nosa Terra achega numerosas claves que permiten desvelar, a partir do seu pensamento, á autora homenaxeada coas Letras Galegas 2024 dende múltiples perspectivas.