Ana I. Boullón
Catedrática de Filoloxía Galega da Universidade de Santiago de Compostela. A súa actividade investigadora está centrada na onomástica, na edición de textos (especialmente medievais) e na lexicografía. Vinculada ó Instituto da Lingua Galega (USC) desde 1985, forma parte do seu comité científico e é responsable da súa Sección de Onomástica, onde realizou, xunto con Xulio Sousa, a web Cartografía dos Apelidos de Galicia, por encargo da RAG. Tamén participou na aplicación Diccionario de dicionarios do galego medieval (DDGM) e coordinaou a Guía dos nomes galegos e a Guía dos apelidos galegos da RAG. Actualmente coordina o Dicionario de apelidos galegos (de próxima aparición), e lidera o Toponomasticon Hispaniae (toponhisp.org), un proxecto de investigación coordinado que consta de seis subproxectos con preto de 60 investigadores de toda a península ibérica. Forma parte do equipo directivo da Asociación Galega de Onomástica (Santiago de Compostela) e é membro numerario e secretaria da Real Academia Galega.
Sobre a historia e o presente dos nomes e apelidos en Galicia
A antroponimia persoal en Galicia ten as súas raíces na Idade Media. Nesta exposición faremos un percorrido pola xestación dos nosos nomes apelidos: como se formaron? de que están compostos? cales son os máis frecuentes? como mudaron os nomes ó longo dos séculos? por que en Galicia temos dous apelidos? Finalmente, comentarase a situación sociolingüística que implicou a castelanización despois da Idade Media (parcial nos apelidos, case total nos nomes) e as formas coas que hoxe contamos para restaurala.