Arquivos: Palestras

Malores Villanueva Gesteira (A Xesteira, Cotobade, 1982) é profesora, tradutora, editora, crítica literaria e doutora en Filoloxía Galega pola USC coa tese A Editorial Galaxia: proxecto e traxectoria 1950-1963. É autora dos libros Lingua e sociedade, a aldea da Xesteira (2006) e A lingua galega entre 1963 e 1975. Situación social e discursos dende o galeguismo (2010), gañadores do Premio Antón Fraguas de Investigación e do Premio novos investigadores, respectivamente. Como crítica literaria, ademais de recensións en diferentes revistas, participou semanalmente no programa Chamando á terra da RG e, na actualidade, colabora no suplemento cultural Fugas, de La Voz de Galicia, e no programa ZigZag da TVG. Publicou artigos en volumes colectivos e revistas especializadas e é autoras das biografías Antonio Fraguas, mestre da memoria (2019) e Francisco Fernández del Riego, un loitador pola idea de Galicia (2022). É Padroeira e secretaria da Fundación Penzol e da Fundación Premios da Crítica.

María Obelleiro Hermida (Soutomaior, 1985) é licenciada en Xornalismo pola Universidade de Santiago de Compostela (USC), ademais de ser graduada en Educación Primaria, mestrado en Protocolo e mestrado en Profesorado de Educación Secundaria Obrigatoria e Bacharelato, Formación Profesional e Ensinanza de Linguas. Comezou a súa traxectoria xornalística no histórico semanario A Nosa Terra e, tras dirixir a publicación Sermos Galiza, foi nomeada directora de Nós Diario, cargo que desenvolve desde xaneiro de 2020. Especialista en xornalismo en Igualdade, colabora con medios de comunicación como a Radio Galega, o medio euskaldun Berria e o medio catalán Vilaweb. Colaboradora na redacción dos Informes de Literatura do Centro Ramón Piñeiro para a Investigación en Humanidades durante cinco anos, obtivo o premio Johán Carballeira de Xornalismo.

Fina Casalderrey (Xeve. Pontevedra, 1951). A creación literaria, o fomento da lectura, a etnografía, a gastronomía, o teatro escolar, os guións cinematográficos… conforman a súa traxectoria.
Os seus libros foron traducidos a todas as linguas do Estado. Algúns tamén ao bretón, coreano, italiano, portugués, francés, inglés, córnico, serbio e chinés.
Na súa extensa carreira literaria obtivo múltiples premios e recoñecementos. Ademais de conseguir en 1996 o Premio Nacional de Literatura Infantil e Xuvenil por O misterio dos fillos de Lúa, acadou, entre outros, os premios Merlín en 1991, Barco de Vapor en 1994, Edebé en 1996, a Medalla Castelao en 2003 e o Premio da Cultura Galega na modalidade de Letras en 2015. Foi candidata ao Premio Astrid Lindgren en 2009 e 2011.
Neste 2023 foi de novo proposta para o Premio Astrid Lindgren, distinguida como ESCRITORA NA SÚA TERRA pola AELG (Asociación de Escritores e Escritoras en Lingua Galega) e elixida pola OEPLI como candidata española ao premio internacional Hans Chistian Andersen 2024, o Nobel de LIX, polo conxunto da súa obra.
Foi mestra. É numeraria da Real Academia Galega.
Para saber máis: http://fina.casalderrey.com.

Escritor, creador audiovisual, músico (cantante e letrista, fundamentalmente co grupo Os Resentidos). Exerceu como profesor de lingua e literatura galegas na secundaria. Dirixiu e presentou programas de radio. Comezou o traballo literario como membro fundador do grupo Rompente. Impartiu conferencias e masterclasses en universidades e centros culturais. Ten participado en numerosos recitais cos seus propios poemas. Foi o máximo responsable da produtora Videoesquimal. Presidiu a produtora Filmanova e as súas filiais entre 1999 e 2017. Foi presidente do Clúster Audivisual de Galicia e da SGAE.Actualmente traballa na filmoteca de Galicia (CGAI), en comisión de servizos para AGADIC. Colabora en Luzes e no faladoiro do programa de radio de Julia Otero. Continúa co seu traballo literario e de letrista, amais de colaboracións en prensa e para outros proxectos audiovisuais.