En 1988 nacían os Cursos de lingua e cultura galegas “Galego sen fronteiras”. Dende entón, cada verán Santiago de Compostela acolle persoas de todo o mundo interesadas en se mergullar na lingua de noso, coa única pausa obrigada pola pandemia da covid. A que foi a XXXVI edición concluíu hoxe coa entrega dos diplomas a algo máis de 60 alumnas e alumnos procedentes de 17 países de Europa, América e Asia, unha festa de despedida en que se puxo o foco no dobre valor desta iniciativa que organiza a Real Academia Galega en colaboración co Instituto da Lingua Galega da USC e co apoio da Deputación da Coruña e a Xunta de Galicia: o valor que os cursos achegan ao alumnado e o valor que o alumnado aporta á sociedade galega e, tamén, ao mundo.