Palestras 2019

ANTÓN REIXA 
8 de xullo. 12.00 h. Facultade de Filosofía
Escritor, creador audiovisual, músico (cantante e letrista, fundamentalmente co grupo Os Resentidos). Exerceu como profesor de lingua e literatura galegas na secundaria. Dirixiu e presentou programas de radio. Comezou o traballo literario como membro fundador do grupo Rompente. Impartiu conferencias e masterclasses en universidades e centros culturais. Ten participado en numerosos recitais cos seus propios poemas. Foi o máximo responsable da produtora Videoesquimal. Presidiu a produtora Filmanova e as súas filiais entre 1999 e 2017. Foi presidente do Clúster Audivisual de Galicia e da SGAE.Actualmente traballa na filmoteca de Galicia (CGAI), en comisión de servizos para AGADIC. Colabora en Luzes e no faladoiro do programa de radio de Julia Otero. Continúa co seu traballo literario e de letrista, amais de colaboracións en prensa e para outros proxectos audiovisuais.

A produción audiovisual como promoción da normalización lingüística

A finais da década dos 70 comezou unha emisión diaria en galego de TVE. O impacto de ver/escoitar galego na televisión foi grande, sobre todo en rexistros ata daquela inéditos. En 1985 inaugúrase a TVG. Isto supoñería 24 horas de emisión en galego.

O relator analizará o efecto destas emisións e da produción independente de cinema no proceso de normalización e na implantación das novas formas que propuña o novo estándar para o idioma. Mención á parte van merecer o impacto destas emisións no público infantil e na identidade colectiva a efecto de recoñecemento xeográfico do país.

PAULINA CEREMUZYNSKA
9 de xullo. 12.00 h. Facultade de Filosofía
Paulina Ceremużyńska estudou Interpretación de Música Medieval cos na Universidade de Paris-Sorbonne e Musicoloxía na Universidade de Varsovia. No ano 2004 trasládase a Santiago de Compostela, para estudar en profundidade a música e a lingua das cantigas medievais galego-portuguesas. Froito do seu traballo de transcrición e interpretación das cantigas de amor do Pergamiño Sharrer, é o disco “Cantigas de amor e de amigo”, a segunda gravación mundial das cantigas de amor do rei portugués don Denís, que obtivo excelentes críticas na prensa especializada. A súa investigación no eido musical deu tamén lugar aos discos E moiro-me d’amor (2007), consagrado a reconstrución da música perdida das cantigas de amigo dos máis destacados trobadores da tradición galego-portuguesa; e Audite Gentes! Salmos do Século de Ouro (2015).En 2015 participou no proxecto dedicado a Hildegard von Bingen de Guillemette Laurens, quen a convidou un ano despois como asistenta no marco da Academia de Canto do Festival de St.Bertrand-de-Comminges, centrada nas Cantigas de Santa María. No ano 2017 organiza en Santiago de Compostela un curso internacional de interpretación historicamente informada das Cantigas de Santa María e en 2019 é convidada ao Conservatorio CRR de París, para dar un curso sobre as cantigas medievais galegas.

As cantigas medievais galegas, un tesouro da música medieval europea (concerto – conferencia)

As cantigas medievais galegas son un dos maiores tesouros da música medieval europea e, xunto co tesouro da música tradicional, o máis importante repertorio da música galega de todos os tempos. Confírmao o recoñecemento e a forte presenza que ten dende hai anos este repertorio nos escenarios de todo o mundo. Este concerto-conferencia pretende achegar o alumnado aos coñecementos básicos sobre os diversos xéneros das cantigas (de amigo, de amor, de Santa María, de escarnho e maldizer), tratando sobre a súa música e o seu texto entendidos como partes inseparables unha da outra.

MARÍA YÁÑEZ
15 de xullo. 12.00 h. Facultade de Filosofía
María Yáñez leva dúas décadas traballando como xornalista en medios dixitais, desenvolvendo contidos audiovisuais para internet, deseñando estratexias de comunicación online e comisariando diversos proxectos de cultura dixital como o festival Carballo Interplay ou o LAIC da Coruña. Na actualidade dirixe VINTE, unha revista en liña de sociedade, cultura e tendencias vinculada ao xornal Praza.gal.

O galego nos medios de comunicación: oportunidades e desafíos no mundo dixital

Un percorrido pola situación da lingua galega nos medios (prensa, radio, televisión e Internet) e os retos aos que se enfronta nun panorama marcado polas novas formas de consumo e produción na Rede. Toda unha ventá de oportunidades para quen queira coñecer e aprender a nosa lingua desde os máis diversos temas e formatos. E unha serie de desafíos que pasan pola sustentabilidade, a calidade lingüística, a pluralidade, o achegamento á xente nova e a conexión co mundo lusófono.

CELSO FERNÁNDEZ SANMARTÍN
16 de xullo. 12.00 h. Facultade de Filosofía
Menos é máis, dicían @s minimalistas, pero deámoslle a volta á frase e pensemos nos tempos que nos toca vivir, no que temos entre mans e en como nos movemos polo día e na noite.Traballei dez anos con persoas maiores asistidas nunha residencia.
Sigo escoitando contos, cantares e historias das súas vidas a persoas que inda lembran a chegada da luz, dos motores e da televisión.
Dáme a impresión de que vivimos bastante de cu a estas persoas que son das que mellor nos saberían contar a vida en conversación.
E iso fago eu, escoitar e contar en compañía, nen máis nen menos.

Contar

A narración oral foi sempre o modo de comunicación por excelencia nas comunidades humanas pre-tecnolóxicas e ágrafas. Os contidos desta comunicación eran en parte coñecementos prácticos e noutra parte sociográficos. Coa chegada dos medios de comunicación modernos, variou esencialmente o paradigma comunicativo tradicional.

Tentaremos ver logo a actualidade e valor da narración oral tradicional.

QUICO CADAVAL
18 de xullo. 12.00 h. Facultade de Filosofía
Quico Cadaval é director teatral, dramaturgo e narrador escénico. Naceu nas Rías Baixas en 1960. Coa súa compañía Producións Teatrais Excéntricas fixo Shakespeare para ignorantes co Centro Dramático Galego, o teatro público galego, adaptou obras de Cunqueiro, como O Ano do Cometa. Como narrador percorre os festivais da península Ibérica e Latinoamérica. Acredita que a cultura galega é a que se espreme en galego, e o que é aínda máis asombroso: acredita que ten futuro.

Figuras do demo. A procura dun teatro popular

O título alude a unha maneira popular de referirse ao teatro e ás marionetas, e lembra a desconfianza que a arte da comedia provocou sempre nas autoridades civís e relixiosas. O relator fará un superficial paseo pola historia do teatro galego deténdose, levemente, nas experiencias que foran un suceso popular da dramaturxia galego. Joselín, Airiños, Barriga Verde, Abrente, Rañolas, Artello, Ultranoite, Chévere, Mofa &Befa, Galán e Voadora, serán algúns nomes presentes no repaso.

JOSÉ SUÁREZ OTERO
19 de xullo. 12.00 h. Facultade de Filosofía
Doutor en arqueoloxía coa tese Locus Iacobi. Orígenes de una Santuario de Peregrinación, é na actualidade arqueólogo investigador do Grupo de Análise Territorial da USC. Foi director das escavacións no claustro da Catedral de Santiago e arqueólogo da Catedral de Santiago, e traballou na divulgación e promoción do Camiño de Santiago como tecnólogo da S.A. de Xestión do Plan Xacobeo. Dirixe dende o 2003 os traballos de descubrimento, investigación e posta en valor do Monte do Facho, santuario galaico (s. II a.C- s. I d.C.) e galaico romano (s. III-VI d.C.). Tamén é codirector do proxecto de reconstrución virtual “Medieval Compostela”, que se está a realizar na UCLA. Foi visiting scholar nesta universidade, no Institute for Pilgrimage Studies (Willian and Mary College) e no Deustches Archäologisches Institut, do que é membro correspondente. É ademais integrante da Comisión Asesora de Patrimonio Histórico da cidade de Santiago de Compostela.

As orixes do Camiño

As orixes do Camiño de Santiago pérdense no enigma histórico da aparición da tumba de Santiago e o seu culto. Lendas, tradicións e algunhas referencias documentais, as máis das veces composteláns, e sempre tardías, derivaron nunha permanente controversia entre dúas posturas antagónicas. Unha, baseada nos contextos históricos e no silencio das fontes, defende a creación medieval do mito da Tumba. A outra, dando credibilidade as tradicións, relatos moitas veces de carácter lendario, e as fontes composteláns, outórgalle credibilidade ao carácter apostólico e á orixe romana da tumba. O relator, dende as fontes arqueolóxicas, proporá unha lectura alternativa que redefine o problema, situándoo nun contexto histórico diferente: dos séculos VI-VII ao IX. Nun proceso no que cuestións relixiosas, pero tamén políticas, mesturaranse para conformar a idea da presenza apostólica e sustentar o culto e a peregrinación ao redor dela.

© 2016 CURSOS DE VERÁN DE LINGUA E CULTURA GALEGAS - REAL ACADEMIA GALEGA